ఎగిరిపోతాను

ఎగిరిపోతాను

అప్పుడప్పుడూ

కన్పించని  గాలిపాటకోసం

చెవులురిక్కించి వెతుకుతుంటాను

వెతుకులాట వెర్రిగా కన్పిస్తుంది నీకు

మూసలోకి దిగిపోయిన ఆలోచనలన్నీ

బయటకువచ్చే

బిరడా మూతనెవరైనా తెరుస్తారని చూస్తుంటాను

ఎవరికివారు

మూసల్లోకి దిగిపోయారనే సంగతే గుర్తుకు రాదు!

నాకు నేనే

మూసను బద్దలుకొట్టుకొని

ఏ తీరంలోనో మూర్చబోతాను

గాలిచేసే వింతసవ్వడులమధ్య

ఈ విషయం ఎలాగో తెలుస్తుంది నీకు!

ప్రవాహమెటు?

ఇక్కడ
నదులన్నీ
గొట్టపు బావులుగా మారి
గోట్టాల్లో ప్రవహిస్తున్నాయి

నీవు చెప్పే లెక్కలేవీ తప్పుకావు

ప్రవాహ కొనగోటి కోసం
అడవిదారిలొ అహల్య

పరిమళాల అత్తరు పగులగొట్టి
పాదాలకు రాయాలని ఒ మరియ

కొత్తచిగురును తొడగాలని
ప్రసవ వేదన పడుతున్న
ఎన్నొ కొమ్మలు

చల్లని సాయంకాలాల
స్నానమాడాలని
పక్షులు, జంతువులు

ఎదురుచూపంతా
ప్రవాహం కోసం

గోదారి అనుబందం -2

 

పడవనెక్కిన బాల్యం
ఓడనెక్కినట్టు సంబరం
తెడ్డును పరీకించిన కనులు
జీవితాన్ని చిత్రించిన రీళ్ళు
***
వాలుకు తెరచాపైనా
ఎదురుకు గడసాయమైనా
పడవెనక పారిపోతున్న అలలు
జీవితాన్నిపయనించడం నేర్పిన పనిముట్లు
* * *
ఎలా మరువగలను
వెన్నెల జలకమాడించి
పరుగులు నేర్పిన ఆ ఇసుకతెన్నలను
పచ్చదనాల నా బాల్యాన్ని

 * * * *

( ఫోటో : కొండవీటి సత్యవతి  )

గోదారి అనుబందం

బాల్యంలో ఈ పచ్చదనాన్ని

నాకెవరో నలుగు పెట్టారు

ఇప్పుడది

గుండెల్లోకి ఇంకింది

**

బాల్యానెవరో చెక్కారు

ఆ బడిలోనో ప్రక్కనున్న గూడిలోనో

ఇప్పుడది

జ్ఞానపు కొమ్మల్లో వూగుతుంది

****

 

ఈతలు నేర్పారెవరో

ఈ నీళ్ళలోనే

ఇప్పుడు

నగరాన్ని ఈదగలుగుతున్నా

**

(అంతర్వేదికి, గోదారికి, కొండవీటి సత్యవతి గారికి, సుజాత గారికి)

అమ్మ మనసున సంతసం

సంతసం అహఁ   హఁ  సంతసం

నా హృదయముప్పొంగుచున్నది

నీ వొసంగిన మేలులకై

ఆశీర్వాదపు జల్లులతో తడిపి

అనురాగపు పరిమళములతో నింపి

నీ బహుమానముల నొసగినందున

సంతసం అహఁ   హఁ  సంతసం

విజ్ఞానపు వినువీధులలో

మా జ్ఞానపు లోతులకతీతమై

నా గర్భమున ఫలము నొసంగినందున

సంతసం అహఁ   హఁ  సంతసం

ధాత్రిలో ప్రతి ప్రసవం వేదన చేసి

ధృతినిచ్చి రోదన బాధలు దీర్చి

ప్రతినిత్యం కృపలతో నింపుచున్నందున

సంతసం అహఁ   హఁ  సంతసం

నీవిచ్చిన స్వాస్థ్యములభిమానముతో

నీ దయలో పెద్దల దీవెనలతో పెంచే

బుద్ది కుశలతకై ప్రార్థించ గలిగినందున

సంతసం అహఁ   హఁ  సంతసం

 ----------------------------------------------------

ప్రతి తల్లి మనసులో పొంగే భావానికి చిన్న ప్రయత్నం

ఈ రోజు పుట్టిన రోజు జరుపుకుంటున్న 

అగష్టస్ -  లీనాల కుమారుడు రాల్ప్ సుందర్ సింగ్ కనుమూరి

సత్యానంద్ - పద్మల కుమారుడు చైతన్య కనుమూరికి

గాబ్రియేలు - కృపారోజ్ ల కుమార్తె  షైనీ లిడియా

అభినందనలతో

మదిలో మెదిలే అపురూప రూపం

నీ రూపం అది అపురూపం
లీలగా మందార మాలగా
మకరంద ధారగా
నాలో నిలచి, నాలో నింపి
నిన్నే వలపింప చేస్తుంది
నన్నే మరిపింప చేస్తుంది

ఒంటరివేళ తుంటరిగా దరిచేరి
మురిపించి మైమరపించి
ఎదగిల్లి మదినల్లి
కవ్వింతల కలవరింతలతో
కళ్ళలో మెదిలేను

కళ్ళుమూస్తే కళ్ళలోచేరి
కళ్ళు తెరిస్తే ఎదలోచేరి
చెక్కిలి చిదిమి కౌగిలి నదిమి
గిలిగింతల పలవరింతలతో
తలపుల్లో తడిమేను

కఠినశిలనైన నన్ను తడిమి, తురిమి
మది తెరచి నను మలచి
ముద్దగా మైనపు ముద్దగా
జీవమై నాదమై

నా జీవితపు వేదమై కదిలేను

రంగు రంగుల పరిమళం

కొమ్మల నడిగా
రెమ్మల నడిగా
నీలో సొగసు ఎక్కడిదని
పూవులనడిగా
రేకలనడిగా
నీలో పరిమళం ఎక్కడిదని

నీ అపురూపవడిలో
నీ ప్రేమజడిలో
మొలచి తడిసి
వడివడిగా నడయాడగా
నీవిచ్చినదే ఈ సొగసు
నీవిచ్చినదే ఈ పరిమళం

చిలుకలనడిగా
సీతాకోక చిలుకలనడిగా
నీ మేనిలోని వర్ణమెక్కడిదని

నీ సహచర్యంలో
నా దినచర్యలలో
కలిపి పులిమి
నీ చెలిమి నా బలిమి కలిమిగా
నీ విచ్చినదే ఆ వర్ణం
వర్ణానికే పేరిచ్చిన చందం

--------------------------------------------

తొలి సంకలనం హృదయాంజలి (మార్చి 2004) లోనిది

నీ కోసం నా మది

హద్దులు చెరిపేస్తా నీ కోసం
సరిహద్దులు మార్చేస్తా నీ కోసం
కొండలు దాటి కోనలుదాటి
ఎల్లలులేని కల్లలులేని
నవలోకం నిర్మిస్తా నీ కోసం

వినీలాకాశంలో రంగుల హరివిల్లు తేలేను నీ కోసం
తెరచివుంచిన రంగులమదినే పరిచేస్తా నీ కోసం

గగనంలో మెరిసే తారను తెంపలేను నీ కోసం
రెక్కలువిప్పిన సౌధాలకై ప్రక్కనుండగలనునీ కోసం

విరిసిన వెన్నెల చల్లదనం పట్టలేను నీ కోసం
గుండెలనిండిన అనురాగాన్ని ఆరబోయగలను నీ కోసం

లలిత పదజాలంతో కవితలల్లలేను నీ కోసం
మమతనెరిగిన ఓ మాట పలుకగలను నీ కోసం  

ఊగిసలాడే మనసు ఊసులు

చిగురాకుల మాటున దాగిన
ఆకుల కొమ్మల మాటున రెమ్మలదాగిన
కొత్తచిగురల వగరులతో
ఒదిగి ఎదగాలని
ఊగిసలాడుతోంది మనసు

సొగసులొలుకు పూరేకులతో
పూరెమ్మల పరిమళాలలో
చిరుగాలి అలలతోచేరి
కొమ్మకొమ్మను రెమ్మ రెమ్మను తాకాలని
ఊగిసలాడుతోంది మనసు

కూనిరాగాల తుమ్మెదల చేరి
పువ్వు పువ్వున మకరందాన్ని గ్రోలి
తనువంతా మధురంచేసే
ఓ కొత్త రాగమాలపించాలని
ఊగిసలాడుతోంది మనసు

కిలకిలరావల పక్షులతోచేరి
కొమ్మరెమ్మల ఊయలూగి
భాషకందని భావాలతేలి
కోకిలగానాల వగరు పొగరుతో
ఉత్సాహపు చిటారుకొమ్మలు తాకాలని
ఊగిసలాడుతోంది మనసు

--------------------------------------------

తొలినాళ్ళ మనసు ఊగిసలాట 

నీవు నిండిన మనసు

నీవే వున్నావు..
నా మనసంతా నీవే వున్నావు
నా తలపుల్లో నా మలుపుల్లో

కనురెప్పల కలత నిదురలో
తళ్ళుక్కున మెరిసే మెరుపులా
రెప్పల్లో కనువిప్పుల్లో
నీవే వున్నావు..

ఉడికించే వడగాలుల్లో
సోలిపోని మల్లెల మాలగా
స్వేదంలో అనుస్వాదనలో
నీవే వున్నావు..

పయనించే జీవన దారుల్లో
తోడుండే ధైర్యపు నీడగా
అడుగుల్లో అడుగుజాడల్లో
నీవే వున్నావు..

ఊయలలూగే మనసు

మనసా ఊగవే ఉయ్యాల
ఊగి ఊగి సాగవే ఈ వేళ

మది కురిసిన వెన్నెల్లో
సన్నని పిల్లగాలి తీవెల్లో
మురిపించే రేయి కౌగిట్లో
మురిసి మురిసి ఊగవే ఉయ్యాల

పట్టాల మెయిలులపై
చెట్టపట్టాల ఈ మెయిలుల్లో
ప్రియుడంపిన సందేశం
తలచి తలచి ఊగవే ఉయ్యాల

గాలి మరచిన ఈ గాలుల్లో
కులుకు జారిన ఈ వేళల్లో
జల్లులా తడిసిన చిన్ని అభినందనకు
తడిసి తడిసి ఊగవే ఉయ్యాల

ఎదురుచూపుల దూరాలు
ఎదను కలిపిన తీరాలుగా
చెవిలో సెల్పోను గుసగుసలను

మరి మరి తలచి ఊగవే ఉయ్యాల

గానం ప్రవాహం కాదా!!

పలకాలి గా రాగం
పాడాలి లే గానం
హృదినిండిన వేళ
మది పొంగి రాదా!
గానం ప్రవాహం కాదా!!

మీటినదెవరో
పలికినదేదో!
చినుకు చినుకుల పలుకులు
పదములల్లిన జల్లులు
తడిసినా వెల్లువ
గానం ప్రవాహం కాదా!!

దాచిన రాగాలు
పలికిన భావాలు
సరిగమల సరాగాలు
గమకాల జావళులు
సవ్వడిచేసే వేళలో
గానం ప్రవాహం కాదా!! 

పులకింతల పున్నమి
నడయాడే చెలిమి
ఆశలే ఊసులై
పూలదారులై పరచి
గుండె రేపే గుబులుతో
గానం ప్రవాహం కాదా!! 

ఎదురుచూసా ప్రతిక్షణం

ఎదురుచూసా ప్రతిక్షణం
ఊహలవేగంతో ఎగిరొస్తావని
కనులలో కదిలే
కలలకే రూపం ఇస్తావని

విడివడిపొయిన ముంగురులు
పడిగాపుల చూపులు
విసిగి వేసారి
నిట్టూర్పుల సెగలైపోవగా...

ముంగురులనే సవరించగ
మోముపై కదలాడిన  వేలికొనలు
గిలిగింతలై నడయాడేనని
ఎదురుచూసా ప్రతిక్షణం

సతమతమయ్యే పనులు
మదికలచే గిరులు
కలచి నిలచి కుతకుతలాడగా
కదులుతుంటే
ఊతమిచ్చే మోతాదుగా
చెవిలో పలికే పలుకులు
మూటల ధైర్యమయ్యేనని
ఎదురుచూసా ప్రతిక్షణం   .

భద్రంగా

ఓ  చెలీ!
అనుభూతులు మాలలుగా
జ్ఞాపకాల పొరలమాటున
దాచాను భావాలే!
రాసాను కావ్యాలే!

తొలిచూపు నవ్వులనే
వాడిపోని రేకులలో
ఏరుకున్న పువ్వులుగా
మనసు పొరల కితాబులో
మలచివుంచాను భద్రంగా

నిదుర రాని కళ్ళలో
నిలుపుకొన్న బొమ్మగా
చెదరిపోని రంగులతో
అల్లుకున్న రుమాలుగా
దాచివుంచాను భద్రంగా


పరాకులో చిరాకులో
ఆదమరచి నేనుండగా
చిరుగాలివై అలరించిన
జారినకురులలో కుసుమంగా
తలచివుంచాను భద్రంగా
---------------------
ఇది రాయటంలో ప్రోత్సాహపు స్పూర్తినిచ్చిన జగతి కి ధన్యవాదములతో

నీలిమేఘం

మేఘం నీలిమేఘం
రంగుల హరివిల్లుకై
చినుకులిచ్చిన మేఘం

వింజామరలా చిరుగాలి స్పర్శతో
యదలో దాచిన వూసులకు
వూతమిచ్చి రేకులు తొడిగి
తునీగలై తారాడగా
తుంపరలనిచ్చిన మేఘం

చినుకు చినుకులారాలి
మనసులో ముడుచుకున్న
భావాలు రాగాలుగా చేసి
కమ్మని గీతాలు నే పాడగా
తనువునే తడిపిన మేఘం

కానరాని చెలియ చూపులు
తరిమి తరిమి వెదకుతుంటే
రెప్పలమాటునున్న కలలు
పురివిప్పి నాట్యమాడగ
పులకరింపచేసిన మేఘం

పల్లకిలో ఊరేగింపు

పల్లకిలో ఊరేగింపు
తొలి సిగ్గుల మేళవింపు
కళ్ళలో ఇంద్రధస్సు
మేనిలో క్రొత్తసొగసు
ఒహోం ఒహోం హోయ్

ఫ్రీజర్‌లో బద్రమైన ఊహలు
గీజర్‌లో కాగుతున్న ఆశలు
గుబాళింపుల పరిమళాలై
ముందునడుస్తూ మున్ముందుకు నడుస్తూ

కలలే ఓ చిగురాకు
పండిన గోరింటాకు
నున్నని బుగ్గలపై చేరి
మెరిసి మురిపిస్తూ మైమరపిస్తూ

గుసగుసలాడే ఆశల ఊసులు
బుస బుస పొంగే కోరికల తూపులు
రాగాలై సరాగాల మేళాలై
వీధుల్లో వినువీధుల్లో ఆలపిస్తూ

నేను - సముద్రం- విశాఖ

ఆపుడప్పుడూ చూసే
సముద్రమంటే ఎదో భయం

దూరాన్నుంచి చూస్తున్న
కెరటం ఎగసిపడి
నన్నెప్పుడూ తనలోకి లాక్కోలేదు

అడుగులు ముందుకేసినప్పుడు
పాదాన్ని తాకిన నురుగు
అనంత అనుభవాల లోతుల్లోకి
స్వాగతం పలుకుతోంది

హోరెత్తే ధ్వని పదే పదే చెబుతోంది
అలలపై తేలియాడటం
అలల్లో మునగడం
నా చేతుల్లోనేవుందని.

ఈ మాటలో నా కవిత - జమ్మి బంగారం చెట్టు

మిత్రులకు, నా బ్లాగు పాటకులకు
నన్ను ప్రోత్సాహించిన వారికి
నమస్సులు
ఈ మద్యకాలంలో సాహిత్యానికి, అంతర్జాలానికి కొద్దిగా దూరంగా వుండవసి వచ్చింది.
దాని పరిస్థితులనుండి బయటపడుతున్న నేపథ్యంలో

ఈ మాటలో నా కవిత వచ్చింది

చదివి, మీ అభిప్రాయాలను రాయండి, కొత్త ఉత్సాహాన్నివ్వండి


అంబులపొదిలో అస్త్రాలేవీ
అక్కరకురానట్టే
సమస్యలు బాణాలై సంధిస్తాయి


http://www.eemaata.com/em/issues/200909/1477.html

మీ

జాన్ హైడ్ కనుమూరి

నిజంగా నీవు ఇక్కడ వుంటే బాగుండేది

నిజంగా నీవు ఇక్కడ వుంటే బాగుండేది

హితులెవ్వరూలేని ఈ నిశ్శబ్దపు రాత్రి

చుట్టూ చీకటినిండుతుంటే

ఈ ప్రదేశమంతా భయంతో నిండినప్పుడు

నీవు ఇక్కడవుండి నా భయం పోగొడతావని

నాలో చిరునవ్వు పూయిస్తావని

నా ఆశ!

దురదృష్టం నీవిక్కడలేవు

నిజంగా నీవు ఇక్కడ వుంటే బాగుండేది

ఇక ఎవరు పట్టించుకుంటారు నన్ను

వెలిగే దివ్వెలకోసం యుద్ధమే!

రేపెప్పుడో వెలిగించే దివ్వెలకోసం
సర్వసన్నద్ద యుద్ధం

ప్రతిరోజూ వూడ్చే చీపురుదూరని మూలల్లో
పొందిగ్గా గూడేర్పరచుకున్న
పురుగులతో చిన్న యుద్ధమే!

వెలుగుచూపు కొత్తదనంకోసం
వేసే సున్నపు చినుకులకోసం
ఖాళీచేస్తున్న గదులు
దించుతున్న చిత్రపటాలతో ఓ యుద్ధమే!

చిందరవందరైన వస్తువుల మద్య
ఎప్పుడో పోయిందనుకున్న
పుస్తకమో వస్తువో కళ్ళకెదురైనప్పుడు
తేలికైన దేహానికి దొరికే ఆనందంలో
ఆదమరచిన ప్రియులతో ప్రచ్చన్న యుద్ధమే!

సదురుతున్న షెల్పుల్లోంచి
హటాత్తుగా ఎగిరొచ్చిన వూహల్లా
ముందుపడ్డ పాత ఫొటోలు
లాక్కుపోతున్న అనుబంధాలు
పరుచుకున్న జ్ఞాపకాలను
మూసివేయడమూ ఓ యుద్ధమే!

ఎన్నో యుద్ధాల జయాల ఆనందహేలలో
వెలిగే దివ్వెల పిల్లలనవ్వులు
విరజిమ్మే కాకరపువ్వొత్తులు

చీకటివేళను చీల్చడంకోసం
వెన్నెల నవ్వులను పూయించేందుకు
ఎన్ని యుద్ధాలైనా సిద్దమే నేను!
----
5116
----
దీపావళి అలంకరణకొసం పనిచేస్తూ ఫోనులో మాట్లాడిన సాహితీ మిత్రురాలు
శ్రీమతి రేణుకా అయోలా దీపావళి శుభాకాంక్షల ప్రేరణ