ఎగిరిపోతాను
అప్పుడప్పుడూ
కన్పించని గాలిపాటకోసం
చెవులురిక్కించి వెతుకుతుంటాను
వెతుకులాట వెర్రిగా కన్పిస్తుంది నీకు
మూసలోకి దిగిపోయిన ఆలోచనలన్నీ
బయటకువచ్చే
బిరడా మూతనెవరైనా తెరుస్తారని చూస్తుంటాను
ఎవరికివారు
మూసల్లోకి దిగిపోయారనే సంగతే గుర్తుకు రాదు!
నాకు నేనే
మూసను బద్దలుకొట్టుకొని
ఏ తీరంలోనో మూర్చబోతాను
గాలిచేసే వింతసవ్వడులమధ్య
ఈ విషయం ఎలాగో తెలుస్తుంది నీకు!
