నీలిమేఘం

మేఘం నీలిమేఘం
రంగుల హరివిల్లుకై
చినుకులిచ్చిన మేఘం

వింజామరలా చిరుగాలి స్పర్శతో
యదలో దాచిన వూసులకు
వూతమిచ్చి రేకులు తొడిగి
తునీగలై తారాడగా
తుంపరలనిచ్చిన మేఘం

చినుకు చినుకులారాలి
మనసులో ముడుచుకున్న
భావాలు రాగాలుగా చేసి
కమ్మని గీతాలు నే పాడగా
తనువునే తడిపిన మేఘం

కానరాని చెలియ చూపులు
తరిమి తరిమి వెదకుతుంటే
రెప్పలమాటునున్న కలలు
పురివిప్పి నాట్యమాడగ
పులకరింపచేసిన మేఘం