నాకో వింజామర కావాలి

Photo from Sakshi

గాయమైన గుండె 

బాగానే పనిచేస్తుందంటారు డాక్టర్లు
ప్రతినిముషం లాగి పట్టే బిగువు ఏమనాలి

నువ్వు పలకరిస్తావు అని 

ఎవ్వరికోసమో ఎదురుచూస్తుంది మనసు
ఎవ్వరులేని చోట నిశబ్దంలోంచి
నాలోంచి నాలోకి ఏదో స్వరం మాట్లాడుతుంది

ఆ ఎదురుచూపు - నిశ్శబ్దాల మధ్య 

వూగిసలాడుతుంటాను
గుండె ఇంకా బరువుగానే వుంటుంది

తప్పటడుగుల చిరునవ్వుల్తో
సమస్తాన్ని తుడిచెయ్యాలనుకుంటాము
ఆ స్వచ్చతకు నడవలేక పాట్లు పడుతుంటాను

మిత్రులారా!
నాకో వింజామర కావాలి
నాలో నేనై పాడుకునే సంగీతాన్ని వెదజల్లాలి ఆ వింజామర

కలగనేందుకు నా కనులు అలసటచెందాయి
అక్షరాలు వాక్యాలై
కొత్త సత్తువను నేను శ్వాసించాలి.